؂تارمئی ٹی چراغ ئس لگف

Untitled-1

عابد جان بلوچ
قربان ہمو ورنا نا اشارہ کن ہراکے باشعور تیکن بھلو پنت ئس اس ولے کن کونا بے وقوف آک دننگا ورناتے بھاز اورے و خوانندہ اننگا ورنا تا سرکل آتیٹی ساڑی مننگ آن پد پْو مریک۔ 
منہ دے مست شال نا اسے بھلو رش کش والو چوک ئسے آ ریاست نا فوجیک بھلو مخلوق ئسے نیمروچ نا وخت آ ٹاک دے آ سلیفیسْر۔ اندا رش کش اٹی ای ہم تینا موٹر سائیکل آ ساڑی اسٹ ولے فوجیک کْور مسْر کنا کنڈ آن و کنے سلیفتاوس۔ ای اندا چوک آن آہستہ آہستہ ہمو ٹاک نیمروچ آ سلوکا مخلوق آ اوریسہ اوتیکن کنا است کپک مس۔ دا سوچ اٹ اسوٹ کہ دا مخلوق انت ئس کرینے کہ دے آ باسونا دن ہْشنگوتا۔ تلاشی ئے تا ہم کریر تا ولے اوتیتو ہچ ئس الو پدا ہم اوتے دے سلیفیسْر۔ اندا سوچ آک کنے پلویڑ کریسْر کہ اسے ورنا سینا کوکار کنا خف تیا تما ہراکے کوکار کریسہ ہناکے۔۔۔تارمئی ئے چراغ لگفبو۔۔تارمئی ئے چراغ لگفبو۔۔ای پریشان مسوٹ کہ دا امرو گنوک ئسے کہ دا ٹاک نیمروچ آ پاننگ ئے تارمئی ئے چراغ لگفبو۔ خیر ای انداخہ کوشست کریٹ تینے اونا خڑک آ سرکریٹ اریفیٹ۔ خیر ئے ورنا دا نیمروچ آ امر چراغ لگفن۔ ہرا شام ئے،داسکان تو دے تینا پورا جوش اٹی ئے ہراکے صرف روشنائی کننگ اف بلکہ ہشنگے ہم۔ نی دا انت پاننگ اوس ؟
کنا سوج نا ورندی ئے اشارہ ٹی تس۔ چوک آ سلوکا ریاست نا فوجی تیا دْو مْریفسہ کنے پارے دا تارمئی ئے چراغ لگفبو۔ کنا ہمو دے آ سلوکا مخلوق کن است کپک مساکہ۔ دا ورنا نا کوکار کنے آ غصہ نا جمر ئے ایس۔ ای پاریٹ۔ اے بیچارہ غاک داخہ مظلوم او کہ دا ٹاک نیمروچ ظالم آتا دون آن سلوکو و نی تینا مسخرہ ئے کننگ اوس پاسہ تارمئی ئے۔ انت دا اوفتا زی آ ملنڈ ئس اف۔ اگہ نی ہم مچے اندا ٹاک نیمروچ آ سلوک مروسْس گڑا نی معلوم مسکہ کہ تارمۂ ئے یا نیمروچ ئے۔۔۔۔۔۔۔۔
عجیب او ورنا ئس اس کہ کنا غصہ والا حالت و لوز آتے بننگ آن گڈ ولدا پارے۔۔۔۔۔ تارمئی ئے چراغ ئس لگف۔۔۔۔۔۔ بس کنا دماغ خاخر الک۔ ای سمجھاٹ دا گنوک اسے الّاٹ تے مونی تینا ہنکین کن سر الکوٹ۔
دا ہمو وخت ئس کہ ای نومیکو کلاس اٹی خواننگ اسوٹ۔ تینامنت آ ای تینے خوانندہ ئس سرپند مسوٹہ۔ ایلو ورنا تے اندن سمجاٹہ کہ دا ہچ پْو مفسہ، داتے خواننگ بفک۔ دا ہچو گڑاس تپاسہ نہ کے حالت آتے پْو مریرہ۔ انتئیکہ او اخبار خواننگ کپاسہ۔ ای ہڑدے اخبار ئے خوانوہ۔ کنے مچا حالت آتا باروٹ معلوم ئے۔ کنے معلوم ئے حکومت نا کاریم آک امر ہننگ او۔ وزیر آک اخس فنڈ الننگ او۔ دا ملک نا مچا وزیر آتا پن آک کنے معلوم او۔ ای ٹی وی ئے ہم اوریوہ۔ کنے معلوم ئے اسلام آباد اٹ انت مننگ ئے۔ قومی و صوبائی اسمبلی ہراوڑ ننا شونداری کن گام ارفنگ او اخس ننا دا سرزمین کن فنڈ لکھیفسہ النگ او۔۔۔۔۔۔۔۔۔ مطلب ای کل آن زیات سیانڑا اوٹ۔
ولے کاش حقیقی آ حالت کنے معلوم مروسْس۔ کنے دا ریاست نا چم آتیان سرپدی ملوسْس۔ کاش ای دا قوم نا حقیقی آ دروشم ئے سرپد مروسْٹ۔ خننگ کے تو بھاز وار خناٹ دا قوم نا حالت ئے ولے کاش پْو مروسٹ تے۔ گڑا شاید ہمو ورنا نا عقلمندی آ اشارہ غاتے پْو مسوٹہ۔ اوڑا سوختہ مننگ آن بجائے اونا دوٹی الکوٹہ پاریٹہ بر کنا کوپہ ای دا چراغ نا لگفنگ کن ہروڑ نا نیتو کمک کیوہ۔ ولے کنے انت معلوم ئس کہ دا ریاست کنے کْور تخانے۔ کنے آن کنا قوم نا حالت، حق نا شعور، قربانی نا فلسفہ، بروکا وخت نا روشنائی آن مْر تخانے۔ 
داسہ مسے سال آن گڈ کالج اٹی گام تخاٹ۔ ورناتا گل ئس خناٹ۔ ہراکے بیدس لالچ و زر آن تینا بروکا ورناتا داخلہ غاتا فارم تے پْر کرسہ جمع کریرہ۔ ای ہم پوسکن بسوٹ۔ اوراٹ کالج اٹ بھلو مخلوق ئس مچے۔ ہر اسٹ اندا کالج ٹی داخلہ الننگ خوائسکہ۔ انتے دا شال نا شار اٹی ئس(سائنس کالج) اندا خاطر آن ہر ورنا دادے تینکن فخر سمجھاکہ کہ ای بازار اٹ خواننگ اوٹ۔ ای ہم اندا خاطر آن اندا کالج اٹ داخلہ ہلنگ کن ہناٹ۔ کالج ٹی پیہنگ تون مون مقابل خناٹ خیسْن او پْچ اسے آ لکھوک ئس’’ نن تینا پوسکنا بروکا خوانندہ غاتے بخیرٹ پانہ‘‘ دا لوز آتا جملہ بلوچی زبان اٹ ہم لکھوک ئس و اوتا خیرغ آن ’’ بی ایس او آزاد‘‘ لکھوک ئس۔
ای سیدھا اندا ورنا تا اسٹال آ ہناٹ۔ سلام دعا آن پد کنے سوج کریر۔ جی پھل نا انت کاریم اسے؟ ای پاریٹ ای داخلہ الننگ کن بسونٹ۔ کنا داخلہ کبو۔۔۔۔۔ بس کنے کرسی سیا تولیفیر کنے پاریر دا سنگت ئے فارم نا پیسہ ایتے دا نیکن داخلہ فارم ئس الیک۔ بس ای فارم نا پیسہ تسوٹ ہموڑے کرسی سیا آرام اٹ توسْٹ۔ خیر دا کنکے فارم الکور پْر کریر تا کنا کْل ڈاکومنٹس آکے خلکور برابر کریر جمع کریر تا۔ کنے رسید ئے تسور پاریر دا تاریخ آ بر انٹرویو ئے نا۔ بس کنا شوق پین زیات مس و کنے احساس مس کہ تینا اخس کیک بندغ کن۔ بس انٹرویو مس۔ داخلہ مس۔ کلاس آک شروع مسْور۔ 
منہ دے آن گڈ اندا ورنا تا مسج ئس کنا موبائل آ بس’’ پگہ یک بجہ غا سرکل لگک ہرانا سرحال دادے ’’بلوچ قومی تحریک اٹ ورنا تا کڑد‘‘ کل سنگت آک وخت آ تینے سر کیر۔ منت وار‘‘ کنے ہچ معلوم الو کہ سرکل امر لگک۔ اوڑے انت ہیت مریک۔ قومی تحریک انتسے۔ ای تو شروع ٹی دا ورنا تا کاریم آن بھاز مطمئن اسوٹ۔ ای سوچھاٹ دا گل نا ورناک انت ئس کرور یقین اٹ کنا فائدہ کن کیرہ۔ بس ای تینتو پاریٹ کہ دا سرکل آ المی کاوہ۔ خیر کلاس آک ختم مسْور۔ وخت ئس ہم اندونو سرکل کن تخار سْر کہ کل کلاس آک ختم مسورہ ولدا سرکل برجا مسکہ۔ بس کلاس آک ایسر مسور۔ داسہ سرکل کن رادہ مسوٹ۔ سر مسوٹ خناٹ کہ ورناک گول گول تولوک او۔ اسے زمہ وار ئس ڈائری ئس ارفینے۔ داسہ سرکل نا وخت مس۔ اندا ڈائری والا ورنا تینا تران اٹ پارے۔ سرکل نا برجائی اٹ شہید آتیکن ارا منت خاموشی کبو۔ کل بش مسور۔ ای ہم بش مسوٹ منہ ساعت خاموشی مس۔ ولدا ہمو ورنا خاموشی ئے پرغسہ سنگت آتے تولنگ کن پارے۔ ہراوخت کہ سرکل شروع مس ورناک تینا تران آکے کریر۔ بس کنا باہ خٹ مس۔ ای تو تینے کل آن زیات معلومدار ئس سر پند مسوٹہ۔ دا ورناک تو بلوچ قوم نا حقیقی آ حالت ئے تالان کننگ۔ انت مننگ ئے پْورا بلوچستان اٹ۔ دانا باروٹ تو کل آخبار آک کْور مسونو و کن کونا بعض آ ورناتے کْور تخانو۔ 
خیر بھلو معلومداری ئس مس بلوچ سرزمین نا۔ بلوچ قوم نا و ریاست نا زوراکی و نا انصافی، خون کننگ، دتر شولننگ۔ داسہ حقیقی آ شعور نا پارہ غا ہنیسہ اسوٹ۔ منہ دے سرکل اٹ تولنگ آن گڈ بھلو شعور ئس دوئی کریٹ۔ داسہ پْو مسوٹ ریاست نا نن تون انت تعلق ئسے۔ داسہ پْو مسوٹ ننے آ غلام نا سیخا گننگانے۔ 
داسہ ہڑدے کالج آ کاوہ و کسر اٹ ریاست نا وحشی آ فوجیک ئے خنیسہ اسے نفرت ئس بریک۔ 
اندن یکانہ ہناٹہ۔ اسے دے ئس خناٹ کہ چوک آ بھلو رش کش ئسے۔ مونی ہناٹ کہ خناٹ ریاست نا فوجیک کل ئے سلیفینو۔ ای چوک آ سر
مسوٹ تو اسے فوجی ئس ہکل کرے پارے’’ سائیڈ پہ کھڑا ہوجاؤ‘‘ ای پاریٹ ’’ میں اسٹوڈنٹ ہوں‘‘ بس کنا داسکان دا لوز آک دوئی آن پْورا پیش تمیتاوسور کہ اسے چپانٹ ئس کنا مون اٹ خلک۔ کنا خنک تارمہ مسْور۔ ای لپڑنگسہ اسے کنڈ آسیا تْوسٹ۔ کنے اندن لگا کہ ای داتا ہزار آتے کسفینٹ کہ دا کنے دا وڑ خلک۔ ای تو اسے خوانندہ سے اُٹ۔ اندا تولوک منہ ساعت آن پد ہوش کنا جاگہ غا بس۔
داسہ دا مچی ئے خنیسہ ہمے ورنا نا کوکار یاد آ کنا بس’’ تارمئی ئے چراغ لگفبو‘‘۔ بی ایس او آزاد نا سرکل آک کنے ٹی بھلو شعور ئس ایسْر۔ داسہ ای ہمو ورنا نا کْوکار ئے پْو مسوٹ کہ دا غلامی نا تارمئی ئے داڑکن جہد کبو قربانی ایتبو آجوئی نا چراغ ئے لگفبو۔ کاش اگہ وختی دا سرکل آتیٹی ساڑی مسوٹہ تو ہمو ورنا تون اوار مرسہ چراغ ئس لگفن کن جہد ئس کریٹہ۔
بھاز زلت، خواری، بے عزتی آن پد جان خلاسی کرسہ سوغند ارفیٹ کہ آجوئی نا چراغ ئے ہر حالت اٹ لگیفوئی ئے۔ دانا روشنائی ئے مچا ورنا تا خیال آتسکان سرکروئی ئے۔

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s