تمرد ءُ شیریں حمل

0

داد جان بلوچ

مرچی ءَ چہ پنج سَد ءْ ھبدہ سال ءَ پیش یک زوراکیں راجےءَ مکران ءِ تیاب دپ ءِ سَرءَ اْرش کت ءْ لْٹ ءْ پل بندات کت۔ اے زوراک یورپی راج پْرتگیزبوتگ۔ آ ایشانی مَستر احمد بن بخدی بوتگ۔ راج دپترءَ چہ بازیں گپانی شاھدی رَسیت۔ دپتر زانت گوشنت کہ پرتگیزی مکران ءِ تیاب دپ پسنی ءَ گوں وتی آپی گراباں اھتگ اَنت ءْ داشتگ اِش۔ ایشی ءَ چہ پد 1515تاں1571آھانی روگ آھگ برجاہ بوتگ۔ مکران ءِ تیاب دپ ءَ قبضہ کتگ ءْ مھلوک لْٹ ءْ کٹ کتگ ءْ مال ءْ دلوت ھم برتگ اَنت۔ گڈاں بامرد ءْ تمردیں بلوچ پْسگ حمل جیئند گوں پرتگیزیاں مزنیں جنگ ءْ چوپے بندات کنت ءْ پرتگیزی زوراوراں پونزءَ رسینیت۔نمیرانیں حمل ءِ نام بلوچ راج دپترءَ مدام چو روکیں چراگ ءَ انت کہ آرا کسے شمشت نہ کنت۔
گْشنت کہ وھدے شانزدھمی کرن ءَ پْرتگیز ی وتی گرابانی دیم ءَ ہندوستان ءِ نیمگ ءَ دینت ھمے سفرءِ میان ءَ تیاب دپ ءِ بازیں بہرے دستی کن اَنت 1506 ہندوستان ءِ تیاب دپ وتی دست کنگ ہور خلیج فارس ءَ بگر تاں ھندوستان ءَ سندھ ءْ مکران ءِ تیاب گوادر، پسنی ،مکران ءِ کلین تیاب دپ وتئی دست ءَ کتگ اَنت۔
مکران ءِ تیاب ءَ پرتگیز اْرش کنگ ءَ پد لٹ ءْ پل زوراکی بندات کن ت۔ ھنچو گْشنت کہ پرتگیزیاں قبضہ کنگ ءْ ھکومت کنگ ء واستہ تیاب وتئی دست ءَ کتگ اَنت۔ آھانی ارش روچ پہ روچ ءَ گیش بوان بوتگ اَنت۔بلوچ وتی تیابانی رکینگ ءِ ھاترءَ میر حمل کلمتی گور ءَ شْت اَنت کہ آھانی بیوپاری راہ تیاب ءَ زِر پرتگیزیاں وتئی دَست ءَ کْتگ۔۔
حمل پہ تمردی ءْ مڈاہ داری وتی لشکرے جوڈ کنت۔گْشنت کہ پرتگیزیانی کَچ سَک باز بوتگ۔بلئے حمل پہ تمردی آیانی دیم ءَ چو کوہ ءَ مِک بیت۔ آ یک جنگی بوجیگے اڈ کنت کہ نام ءَ شاگ ءِ ے کنت۔
جنگ سک مزن بیت۔ بلئے گڈسر ءَ تمردیں حمل پرتگیزیا ں پروش دنت۔ پرتکیزی واتر بنت ءْ مھلوک پدا آسودگی ساہَ کَشیت۔
مردم کسہ کارنت کہ یک روچے حمل گون وتی ھمراہ ءْ ھمبلاں پہ سیل ءْ شکارءَ شاگ ءِ سر ءَ زر ءَ در کپیت۔ ھمے وھد ءَ مزنین توپانے کیت کہ چول دیان ءَ شاگ ءَ ھندوستان ءِ زرءَ سرکنت۔ آ وھدءَ ھندوستان ءِ زِر پرتگیزیانی دَست ءَ بَنت آ وھدے شاگ ءَ گندنت گڈااے دیم ءْ آدیم چپ ءْ چاگرد ءِ ے کن انت۔ توار جَن اَنت کہ میر حمل وت ءَ مئے دَست ءَ بدئے۔
بلئے میر حمل وت ءَ آیانی دست ءَ دیگ ءَ چہ گیش جنگ ءَ ارزشت دنت۔ بلئے ھئیپ کہ آئی ءِ دست ءِ زہم کپیت۔ ھمے وھد ءَ آ گوشیت۔
* منی سگار من ترا چہ وتی بچاں دوست داشت اَت
*من ترا چہ وتئی بانکیں جنک ءَ دوست داشتگ اَت
*تو چیا چہ حمل ءِ شیری پنجگاں کپت ئے ماں زر ءَ 
*تیگ من ءَ گندیت ءْ زِرءَ گندیت ،چہ من بہتر آ زِرءَ گندیت۔
حمل ءِ زہم ءِ کپگءَ گوں پرتگیزی وتی دام ءَ حمل ءِ سر ءَ دور دینت ءْ آئی ءَ دزگیر کن اَنت۔ آئی ءَ گوں گوک بندیں ریزاں بندنت۔
حمل گْشیت کہ حمل ءَ مرگ ءِ چار چیز وش بنت۔ جاھو ءَ میڈ، راجرو ءَ آسک پہ وشی گَل کن اَنت 
گْشنت کہ وشی بہ کن اِت کوھاں بہ چر اِت کہ نو کَسی تْرس نیست،
حمل شْتگ نو کَس مارا شَل سریں تیراں نہ جنت
گْشنت کہ اے جنگ ءَ چیزے دشتی حمل ءَ ہمراہ بوتگ کہ آ چہ مَرگ ءَ تْرس اتگ ءْ جستگ اَنت۔ ہھمے واستہ بلوچی بتلے کہ حمل ءَ ھمراہ بے دلیں دشتی بوتگ اَنت۔
میر حمل آیانی بندیگ بیت بلئے آ حمل ءَ بازیں لب ءْ ملامے دیگ ءِ جہد کن اَنت کہ حمل آیانی گوما ھمگرنچ بہ بیت ءْ آیانی جنکے سانگ بکنت کہ آیانی نسل ءِ توک ءَ حمل ءِ وڑیں بامردے ودی بہ بیت۔ بلئے میر آیاں تچکیں پسو دنت کہ
جن فرنگانی حمل ءَ پسند ءَ نہ بنت
وت گشئے ھوک اَنت، چک گشئے ھوکی گلڑ اَنت
پشک اِش لکْ اَنت ناپگانی کنڈاِش دراَنت
ناہی چانگالاں گوں مکسکاں ایر بر اَنت
پرچا کہ حمل زانت کہ آ تہنا یک مردمے نہ اِنت بلکیں وتی راج ءِ چم ءْ ٹیلگ اِنت۔آ راج ءِ تمردی ءِ چیدگ اِنت۔ ھمے واستہ آ مَرگ ءَ وش اَتک کنت بلئے پروش نہ وارت ءْ بلوچ راجدپتر ءِ تاکانی توک ءَ مدامی نیمران بیت۔

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s