سالار جان تو نمیران ئے

14641957_1162201060526010_2008015594858344453_n

چراگ بلوچ
بلوچ ءِ وت واجہی ءِ جدوجہد ءَ ہزاراں انچیں ورنا ودی کرتگ کہ آھاں وتی فکر و نظریہ ءِ باوست ءَ وتی چاگرد سیاست ءِ سکین داتگ ءُ دشمن ءِ ہر پندل اِش بے سوب کرتگ ۔اگاں ما سرجمیں دگنیا ءِ دپتر ءِ سرا چمشانک بہ دئیں چاریں ما ھمے گندایں کہ ہر زور آوار ءِ جہد ءُ کوشست ہمے بوتگ کہ نوک نوکیں پندل بہ سازیت ءُ دوہمی قومانی زمین ءِ سرا تاں دیراں وتی قبضہ ءَ برجم بہ داریت ۔گڈا اودامارا گندگ ءَ کئیت کہ نوجوانانی سرا فوکس گیش بوتگ تاکہ آہانی طاقت ءُ تمردی پہ راج ءِ باندات کدی ہم دیمامئیت۔ ورناھاں چاگردی سل کاریانی تہا دست گٹ کنگ ءِ واستہ مزنیں قوت ءِ ھرچ کنگ بوتگ،آھاناں چہ وانگ ءُ زانگ ءَ دور دارگ ءِ کوشست بوتگ ءُ چہ چاگرد ءَ سندگ بوتگ انت۔ منشیات عام کنگ بوتگ۔بلے وھدے راجی زرْمبشاں سر چست کرتگ ہمے کلیں قبضہ گیرانی ہیلہ ءُ پندل بے سوب بوتگ انت۔بلوچ تاریخ ءِ تہا ہمے کلیں عمل پاکستان ءَ بلوچ چاگرد ءُ بلوچ ورناہانی ھلاپ ءَ گوں زور ءُ شور کارمرزکرُتگ انت ،بلوچ چاگرد مٹ کنگ ءُ یک منشیات ءِ کاروباری اڈہ ءِ تہا بدل کنگ ءِ کوشش کنگ بوتگ،بلوچ چاگرد مذہبی انتہا پسندی ءِ نیمگ ءَ برگ ءِ مزنیں کوشستے بوتگ کہ آ روچ ء مرچی گوں تیزی ءَ بوہگ ءَ انت۔بلوچ ورناہانی واستہ وانگ جاہانی در بند کنگ بوتگ انت ءُ روچ ء مرچی ہم بلوچ ورنا وانگ جاھاں روگ ءُ وانگ ءَ آزاد نہ اَنت۔اے کلیں ریاستی پندلاناں بلوچ ورناھاں گوں وتی کمٹمنٹ ءُ بودناکیاں بے سوب کرتگ انت ءُ بلوچ چاگرد یک سیاسی چاگرد جوڑ کنگ ءِ کوشش کرتگ،بلوچ چاگرد ءَ را چہ مذہبی تانسردوستی رکینگ ءِ جہد کرتگ،بلوچ چاگرد ءِ سیکولر اقدار داشتگ انت ءُ یک حدے ءَ داں بلوچ چاگرد ءِ تہا یک انسان دوستیں رووشتے آرگ ءَ سوب مند بوتگ انت۔ زور آور ءِ کلیں پندلانی بے سوب کنگ ءَ بلوچ ورناہاں مزنیں کساسے ءَ وتی سر ہم ندْر کتگ۔
منی اے نبشانک ءِ مقصد یک انچیں ورنا یےءِ جہد ءُ کرد ءَ دیم ءَ آرگ ءِ کوشش اِنت کہ آئی ءَ وتی مخلصی ءُ کمٹمنٹ ءَ جہد ءِ تہ ءَ کسانیں وھدے ءَ مزنیں کردے پیلو کتگ ۔ من سدکاں کہ منی ند ءُ سیاہی یک انچیں ورنایے ءِ کرد ءَ بیان کت نہ کن اَنت کہ آئی ءَ وتی زند پہ راج ءَ ندر کتگ، بلے کد ء وت جہد کناں۔
آ بلوچ ءِ بہادر ءُ سیاست ءِ چپ ءُ راست ءَ سرپد یں بچ سنگت خمار جان انت۔ چہ نام ءَ خمار ءِ بازیں سنگتے ھم بلکن ءَ واقف مہ بیت چیا کہ خمار کدی سالار بوتگ ،کدی دوستیں ءُ کدی چو بہادریں گہرام ءَ بوتگءُ وتی کرد ءِ پہ آزادی ءُ وشحالی ءِ واستہ پیلو کرُتگ ۔
من ءُ سالار جان (منا اے نام اے خاطر گیشتر دوست بیت پرچہ کہ اے یک اعزاز ے سنگت را گل ءَ داتگ، آئی ءِ تہا یک سالارے بوھگ ءِ کلیں صلاحیت بوتگ انت)چہ در کسانی ءَ یکیں میتگ ءَ وتی زھگی تاں نوجوانی ءَ سر کرتگ،یکیں اسکول ءَ در برتگ۔ما ھواری ءَ شہیداُستاد علی جان ءِ سرکل ءِ بہر بوتگ انت،البتہ یک اعزازے منا چہ پیسر شہید سالار ءَ رستگ کہ آ چہ من پیش بی ایس او آزاد ءِ باسکی گرگ ءَ سوبمند بوتگ۔
سالار جانءَ2009بی ایس او ءِ باسکی رس اتگ اَت بلے من یک سالے رند بی ایس او آزاد ءِ باسکی گپت۔آئی ءِ وجہ اے بوتگ کہ وتی علاقہ ءِ اسکول ءَ چہ فارغ بوھگ ءَ پد من وتی وانگ ءِ دیما برگ ءِ خاطر ءَ شال شتاں، ءُ سالار جانءَ معاشی نزوریانی سوْب ءَ دیم ءَ ونت کت نہ کت۔ بلے علاقہ ءَ آئی ءِ تربیت چہ منا گیش بوتگ ات پرچا کہ اُستاد علی جانءِ سرکل ءِ مٹ نہ پاکستانی کالجز بوت کن اَنت ءُ ناکہ یونیورسٹی،اے شرپ سالار جاں ءُ کوہڑو ہر ہما ورناہاناں رس اتگ کہ آعلاقہءَ بوتگ اَنت ۔وھدے من گوں اے ورناہاں دوچار کپتاں ،گڑاں آ وھدا سیاست ءُ سیاسی بحث وءُ مباحثہ سر چست کرُتگ اودا منی کالج ءِ ڈگری ءُ منی سرپدی ءَ دست چست کرتگ انت۔من اگاں نیوٹن ءِ قانونانی گپ جتگ گڈا آورناہانی گپ ءُ ترانانی تہا فینن،میکسم گورکی،ٹالسٹائیءِ گشتن ءُ ناولانی بابت ءَ بوتگاں،آ دیواناں جیولس فیوچک ءِ سرگزشت ءِ اسیر ءِ سرا گپءُ تراناں منا پہکا آھانی دیما دست چست کنگ پرماتگ۔
سنگت سالا جان ءَ را وتی لوگ ءِ مردماں دوستین ءِ نام ءِ سرا توار جتگ ۔دوستیں سالار ءِ پیروک ءِ نام بوتگ۔ سالار جانءِ اسلیں پجار کمار بوتگ کہ آئی ءِ پت انڈین گلوکار کمار سانو ءَ چہ متاثر بوتگءُ ھمے نام ءِے زرتگ ۔آ یک لبزانک دوستیں مردم ے آئی ءِ ہمے لیکہ بوتگ کہ من وتی کمار ءَ انڈین کمار سانو ءِ پیمیں آرٹسٹے جوڑ کناں،بلے کمار ءَ وتارا کمار ر سانو ءِ جاگہہءَ ہندوستان ءِ آزادی ءِ جدوجہد ءِ یک بلائیں کردے ءِ واھندبھگت سنگھ ءِ فلسفہ ءِ منّوک ءِ جوڑ کرت۔
سالار جان سیاست ءَ گوں ھنچیں دوستی یے بوتگ کہ مدام گوں سیاسی سنگتاں بوتگ۔کدی چیئرمین زاہد ءِ ہمراہ بوتگ ءُ کدی چیئرمین کمال ءِ ۔ءُ مدام گوں ہر سنگت ءَ حال واحوال ءِ تہا بوتگ۔من ءُ سالار جاں سک باز یکجاہی ءَ کار کرتگ،آیک ورنائیں لیڈر ے بوتگ ،بلے عوام ءِ تب یئے ہم جوانی ءَ زانتگءُ بازیں ہند ءُ دمگاں منی راہ شناسی ءِے کرتگ۔سالار جانءِ فکر ءُ فلسفہ ہمے بوتگ کہ بید ء عوام ءَ جدوجہد سوبمند نہ بنت،آئی ءَ مدام عوام ءَ گوں ہمگرنچی ءِ سرا زور داتگ، وھدے کلیں علاقہاں ریاستی فوج تالاں بوت انت ،عوام ءِ سرا تشدد گیش کنگ بوت ،ہرٹ اینڈ مائینڈآپریشے بندات بوت ۔ گڈا ہمے وہدا ہم سالار جان میتگاں،کوچگاں ،اسکولاں گوں ماسٹر ءُ وانندھاں ہوار مردماں گوں گند ءُ نند کنگ ءَ اَت۔ وھدے سنگتاں حالتانی سختی ءِ سوْب ءَ اے پیمیں کاراں ھوار بوھگ ءَ مکن کرت، سالار ءِ گپ ہمے بوتگ انت کہ مہلوک ءَ اے وھدا گیش مئے ساڑی بوھگ پکار انت ۔اگاں ما اسکول ءُ میتگاں نہ بوتیں سرکار ءِ کاسگ چٹ مئے مردماں گیش پریشاں کن انت۔آوان مارا چہ گستا کن انت۔

من ءُ سالار جاں گیشتریں وہداں یکجا بوتگیں ،من سالارءِ وڑیں برداشت ءُ صبر کنوکیں ورنا باز کم دیستگ،کدی ہم دوہمی ءِ رویہ آں سالار ءِ پیشانی کرچک نہ کرتگ، چونیں ہم ردی یے ورنایے ءِ دست ءَ بوتگ سالارءِ کرا آئی واستہ مدام یکیں گال بوتگ کہ ردی انسان کنت۔
سالار جان مدام عوامی سرکلانی ءُ مُچیانی تہا گوْشتگ کہ تاریخ ہما مردماں ذلیل ءُ بد گوشیت کہ آواں گوں وتی راجی زرمبشاں دغا کرتگ ،وتی ذاتی وشیانی خاطر ءَ راجی جنزءَ چہ گستابوتگ انت،ہما بلوچ کہ مرچی پہ چار کلدار ءَ چہ جہد ءَ گستا بوھگ ءَ انت آھاناں تاریخ ءَ چہ سرپدی نیست ۔آہوکیں روچاں آھانی پدریچ ھم آھاناں وتی کنگ ءَ بے شرپی محسوس کن انت۔بلوچ ءِ کرا آھانی درور چو بنگلادیش ءِ بہاریانی ءَ پیم ءَ بیت۔تاریخ ہما مردمانی سرا ناز کنت کہ آ پہ وتی راجی زرمبش ءِ دیمروی ءِ واستہ پند بُر اتگءُ قربانی ءِ دئیگ ءُ چک ءُ پد نہ بوتگ انت۔
سالار جان مدام ہر سے چار روچ ءِ سرا منا حال کرتگ ءُ علاقہ ءِ ،سنگتانی،وتی کارانی،ریاستی آپریشنانی ھال ءُ اغوا بوتگیں مردمانی لسٹ داتگ انت ءُ مدام گوں وشی ءَ گوشتگ ءِے کہ ما گوں سوبمندی وتی کاراں دیما برگ ءَ ایں،ما کورک ءُ دراہی بینٹ ءِ ورناہانی بنزہ اڈ داتگ انت۔،من آرا مدام گوشتگ کہ چہ ریاستی ملاہاں وتارا ءُ وتی سنگتانی ھیالدای ءَ بکنت ۔ مدام مسکراِ ءِے کرتگ ءُ گوشتگ ءِے ایشاں وتی زہر وارتگ انت،اے نی بے گوات انت ۔بلے منی آئی ءِ حال ءُ حوال ءِ چیز ءِ روچءَ رند منا اے درد ناکیں حال ءَ گپت کہ سالار جان ریاستی ملاہاں جتگ ۔ منی قلم ءُ زبان ءَ ہمے گپ در کپت کہ سالارجان تو نمیران ئے۔

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s