ادیب نا کڑد نوشت

s-l400

عابد بلوچ

ادیب ہمو انسان مریک ہرا کہ اسے راج سینا دروشم آ ہر وخت تینا نظر ءِ شاغسہ ہمو راج نا ہر جوان او گندہ، حق او نا حق، راست او چپ، انصاف و نا انصافی،ظلم و زوراکی و انسان نا بنیادی حق آتا باروٹ الس اٹ شعور و آگاہی تالان کننگ کن تینا راست اننگا خیال آتے شاعری، افسانہ،ناول و نوشت نا دروشم اٹ خوندی کیک۔ دنکہ سیانڑاک پارہ کہ ادیب راج نا آدینک مریک۔ آدینک ہمو شیشہ ءِ ہراٹی بندغ تینا حقیقی آ دروشم ءِ خنیک۔ ولے بعض آ ادیب آک اصل کڑدار آن چپ مرسہ اسے زرخرید سینا کڑد ءِ دوئی کریرہ، دنکہ راج نا مچا نا انصافی، ظلم و زوراکی و انسانی حق آتا لغت ماری تے خنیسہ حاکم نا تعبداری نا خاطر آن قلم نا بے حرمتی کرسہ حق و ناحق، ظالم و مظلوم نا فرق ءِ مٹائفسہ اسے مجرم ئس جوڑ مریک۔ ولے ہراڑے دا وڑ نا مجرمانہ او ادیب ارے ہموڑے ادیب نا حقیقی آ دروشم اٹ گڑاس ہستی تینا قلم نا کمک اٹ راج نا ہر گندی و ظلم و زوراکی تے بے بیدس خوف و لالچ آن دنیا نا مون آ تالان کیرہ۔ اندا وڑ ادیب بھلو زمہ دار او ہستی ئس مریک ہرانا زمہ ءِ کہ راج نا حقیقی آ دروشم ءِ دنیا نا مون آ تالان کے۔ اسے راج ئس ہمو وخت آ شون الیک ہرا وخت آ کہ اونا ادیب آک غفلت نا تغ آن بیدار مرسہ تینا قلم نا کمک اٹ راج نا دشمن تیتو جنگ اتیرہ۔ راج نا پوسکنا ورنا تیٹی اسے ہندونو شعور ئس تالان کننگ کن نت دو خلیرہ ہرا کے انسان نا بنیادی شعور اٹ بریک دنکہ جوان گندہ، ظالم مظلوم، حق نا حق و انسانیت نا رکھ۔ ادیب مچا انسانیت نا پاسدار مریک۔ مطلب انسانیت تن ہرا جاگہ غا ہم ظلم و زوراکی مریک یا اونا بنیادی آ حق آک پلنگیرہ تو ہموڑے اندا ہستی تینا لوز آتیٹی ظالم و حاکم نا تغ ءِ حرام کیک۔ بلوچ راج اٹ ہم ادیب آتا اسے گچینو کڑد اسے۔ تاریخ گواہ ءِ کہ ہرا وخت آ سرزمین بلوچستان آ قوضہ کننگا چائے او ہرا دروشم اٹ بس ولے دا دھرتی نا جنگجو تیتو اورا ادیب آک ہم اسے بہادر او کڑد ئس دوئی کریر۔ تینا الس اٹ قومی شعور و بیداری ودی کننگ، قوضہ گیر ءِ قوضہ کننگ نا احساس تننگ، تینا دھرتی نا رکھ اکن جہد کریر۔ صرف دشمن ءِ بے تغ کتوس بلکہ دا دھرتی نا لغور و بزدل آتے ہم شغان ترسہ بروکا نسل نا مون آ اوتا کڑد ءِ اسے بزدل ئس نشان تسور۔ دنکہ ہرا وخت کہ انگریز سامراج سردار و نواب آتے بگی ءِ چکیفے تو ہموڑے بلوچ قوم نا مزاحمتی آ شاعر ملا مزار بنگلزئی تینا لوز آتے شاعری نا دروشم ترسہ بزدل آتے غیرت نشان تس۔ ہراڑے بھگی چکوکا سردار آتے شغان تس ہموڑے انگریز ءِ نا مون آ چلتن نا مثل اٹ سلیسہ جواب تروکا نواب خیر بخش مری(اول) نا بہادری نا واقع ءِ ہم قوم نا مون آ تالان کرے۔ میر یوسف عزیز مگسی قوم ءِ غلامی آ کشنگ کن اسے تاریخی او کڑد ئس دوئی کرے۔ ہمو دور اٹ انگریز سامراج ءِ تینا دھرتی آ قوضہ گیر نا خلاف تینا لوز آتیٹ جنگ تس و قوم اٹ شعور تالان کرے۔ اندا وڑ بے شمار ادیب آک بلوچ راج اٹ چراغ نا مثل اٹ داسکان روشن سلوکو۔ بابو عبدالرحمٰن کرد، میر عبدالعزیز کرد، بابو نادر قمبرانی، محمد حسین عنقا، میر گل خان نصیر، واجہ صباء دشتیاری و پین کہی ادیب آک بلوچ راج نا پاسداری ءِ کرسہ بیدس خوف و لالچ آن ہر جوان گندہ و ظالم و جابر نا مون آ چلتن نا مثل اٹ جک سلیسہ تینا ترندی اننگا لوز آتیٹی اکل تسور۔ اینو نا دور باری ٹی ادیب آتا کڑد آ چنکو جاچ ئس الین تو دا گڑا ننے بھاز آسانی اٹ دوئی مریک کہ ہرا ادیب حقیقی ڈول اٹ تینا اندا جاگہ غا سلیس و ہرا تینا حقیقی آ حالت ءِ بدل کرسہ حالت نا سختی و سوری تیتو اوار بدل مسور۔ بلوچ راج اٹ اندونو ادیب ہم ارے ہراکے راج نا گندی و نزوری، حاکم ءِ وخت ءِ دا کلہو تسور کہ نی دا دھرتی، دا راج اٹ غیر انسانی کڑد ادا کننگ اوس، ولے بھاز اندونو ہم اسُور ہراکے سخت اننگا حالت آتا دون آن تینا قلم نا استعمال ءِ جتا کریر، تینا شاعری، مضمون نگاری، افسانہ، ناول و فکشن اٹ بدلی ایسُور۔ تاریخ ہمو اسٹ اننگا گڑا ءِ ہراکے انسان نا ہر کڑدار ءِ خوندہ کرسہ مچا انسان تا مون آ تالان کیک و بروکا نسل آتے ہم دا نا کڑدار ءِ نشان ایتک۔

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s