روس ءُ میاں استمانی سیاست ءِ چست ءُ ایر

3809a15a-cd6c-43c7-80c8-71bcff21e2ae-copy-768x432:کمبر بلوچ
سویت یونین ۱۹۲۲ ءَ جوڑ بوت ءُُ ۱۹۹۱ ءَ پُرشت۔ سویت یونین ءِ پُرشگ ءَ پد ۱۵ ملک آزات بوتنت۔ چوناہا سویت یونین ءِ پُرشگ ءِ پُشت ءَ آئی ءِ مالی جیڑہاں ہوار سرمایہ دار بلاک ءِ ہم مزنیں دستے ات۔ کُجام ہم ملکے پُرشیت گڑا آئی ءِ دژمنیں ملک آئی ءِ سرا ہنچیں نگیگیں جاور کارنت کہ آ پدا ہچ وڑا چست مہ بیت ءُُ دیما مئیت۔ ہمے واستا ۱۹۹۱ ءَ کہ سویت یونین کہ پُرشیت گڑا امریکا، چیچنیا ءُُ گوریچانی قفقاز ءَ مذہبی شدت پسند کمک کرت انت ءُُ پدا ہنچیں جاور ودی کتنت کہ روس وتی تہی جیڑہاں گوں مان بہ گیشیت ءُُ پدا وتی پادانی سرا اوشتگ ءِ جہد مہ کنت۔ اے مذہبی شدت پسندانی کمک ءِ یک مول ءُُ مرادے اے بوتہ کہ آئی ءِ وسیلہ ءَ امریکا ءُُ مغرب سنٹرل ایشیا ءِ تہا ایشانی وسیلہ ءَ روسی مفاداتاں تاوان بدئینت۔ سویت یونین ءِ پُرشگ ءَ پد روس ءِ معاشی جاور انچو نگیگ بوتگنت کہ آ اِے جاہ ءَ رست وت ءَ بس وتی پادانی سرا بہ داریت ءُُ دنیا ءِ سرا ہچ وڑیں اثر ے دور دات مہ کنت۔ ہمے سبب ات ۱۹۹۱ ءَ بگر داں ۲۰۰۰ ءَ روس وتی تہی جیڑہانی گر ءُُ دار ءَ گوں مشکول بوت۔ بلئے اے نیام ءَ آ گوریچانی قفقاز ءُُ چیچنیا ءَ مذہبی شدت پسندانی ءُُ قوم پرستانی جد ءُُ جہدانی ہلاس کنئگ ءَ سوب مند بوت ءُُ پدا آئی ءَ اودا جوانیں وڑے ءَ وتی پاد ایر کتنت۔ ہمے وہد ءَ روس کہ وتی تہی جیڑھ ءُُ معاشی جیڑہاں گوں سر پہ سر بیت گڑا اے وہد ءَ امریکا گوں وتی ہمپتی ملکاں دنیا ءِ سرا وتی اثراتاں روچ پہ روچ گیش کنان کنت ءُُ بازیں ملکانی تہی جیڑہانی تہا وتی دستاں ہوار کنت ءُُ پدا ہمے جار ءَ جنت کہ من دنیا ءِ سروکاں ءُُ اگاں کسے منی راہ ءُُ راہ بنداں مہ من ایت من آئی ءَ جنان ءُُ ہلاس کناں۔
۲۰۰۱ ءَ ورلڈ ٹریڈ سنٹر(World trade center)ءِ سرا ارشاں پد امریکا ءَ موہ رست کہ آ افغانستان ءِ سرا ارش بہ کنت ءُُ پدا آ ہمدا بہ نندیت ءُُ سنٹرل ایشیا ءِ سرا وتی اثراتاں دَور بہ دنت۔ اے ارش پہ امریکاءَ یک جوانیں راہے ات کہ آ بئیت ءُُ سنٹرل ایشیا ءَ وتی پاداں گوں محکمی ءَ بہ اوشتیت۔ پمیشکا بازیں زانت کارانی گشئگ انت کہ ورلڈ ٹریڈ سنٹر(World trade center)ءِ سرا ارش کنانئینگ ءَ امریکا ءِ وتی دست ہوار انت۔ پرچا کہ امریکا ءِ واہگ بوتگ آ وڑے ءَ ناں وڑے ءَ بئیت ءُُ سنٹرل ایشیا ءَ وتی اثراتاں دَور بہ دنت۔ افغانستان ءَ پد امریکا ءَ گوں وتی ہمپتیاں عراق ءِ حلاف ءَ وتی رسانک در ءِ تہا یک ہنچیں پروپگینڈا مہمے بندات کُت کہ عراق ءِ تہا مردم کُشیں سلاہ ہست اَنت کہ آیانی سبب ءَ انسانیت ءَ تاوان رست کنت ءُُ اِے سلاہانی ہلاسی المی انت۔ امریکا اے پروپیگنڈا ءَ پمیشکا کنت کہ آئی ءَ عراق ءِ سرا ارش کنئگ ءِ یک راہ ءُُ درے بہ رس ایت۔ ہمدا ۲۰۰۳ ءَ امریکا گوں نیٹو فوج ءِ ہمراہی ءَ عراق ءِ سرا ارش کنت ءُُ عراق ءِ تہا وتی فوج ءِ بیسے جوڑ کنت ءُُ دانکہ روچ ءِے مروچی ہم امریکا عراق ءِ تہا نشتگ۔ اے وہد ءَ کہ امریکا عراق ءُُ افغانستان ءَ ہوار آ دگہ ملکاں دزمانجنی کنت اے ہنچیں وہدے ات کہ روس آ جاہ ءَ نہ بوتگ کہ امریکا ءُُ آئی ءِ ہمپتی ئیں ملکانی دیما بہ داریت۔ ءُُ امریکا ءِ ارشانی آماچ بوتگیں ملکانی واستا توجیلے بہ سازیت۔ بَلے اے ہمے وہد انت کہ روس گوں پوٹن ءِ سروکی ءَ وتی تہہ ءُُ توکی جیڑہاں گیش ءُُ گیوار کنان کنت ءُُ وتی معیشت ءَ ہنچیں وڑے ءَ محکم کنت ءُُ دیما آیان بیت کہ آؤکیں وہد ءَ دنیا ءِ سرا اثراتے دَور دات بہ کنت۔ امریکا ءُُ آئی ءِ ہمپتی ملک گندنت کہ روس پدا وتی پادانی سرا اوشتگ ءَ اَنت گڑا آ روس ءَ وتی ہمساہگاں گوں گر ءُُ چیل کنئگ ءِ جہد کن اَنت۔ دانکہ روس دیما مئیت۔ بَلے اِے وہد ءَ روس ءَ وت ءَ ہنچیں وڑے ءَ تیار کتگ کہ آ دنیا ءِ جیڑہانی تہا وتی دزمانجنی ءَ بندات بہ کنت ءُُ ۷ اگست ۲۰۰۸ ءَ بگر داں ۱۲ اگست ءَ جورجیا ءِ سرا ارش کنت ءُُ ابکازہ(Abkhaza)ءُُ اوسیٹیا(South Ossetia) ءِ دمگاں چہ جارجیاءِ دسترس ءَ پچ گیپت ءُُ آیانی آزادیں بستار ءَ برجاہ داریت۔ روس جورجیا ءِ سرا اے ارش ءَ گوں دنیا ءَ ہمے کلوہ ءَ دنت کہ من ہستان ءُُ کسے ہم منی نفا ں تاوان بہ دنت گڑا من وتی پہریزگ ءَ پہ مزنیں گامگیجانی زوگ ءَ ساڈیاں۔
عرب اسپرنگ (Arab Spiring)
پدا ما ۲۰۱۱ ءَ گندیں کہ عرب اسپرنگ ءِ نام ءَ مشرقی وسطیٰ ءِ تہا یک لس مہلکوکی آشوبے چست بیت کہ آ مشرقی وسطیٰ ءِ بازیں ملکانی تہا وتی اثراتاں دَور دنت۔ ہمے آشوب ءَ پد داعش ءِ وڑیں گل دیما کاینت ءُُ مذہبی انتہا پسندیں گل جوڑ بنت ءُُ اے ملکانی تہا مردمانی کشت ءُُ کوش بندات کننت۔ امریکا ءُُ مغرب ہمے آشوب ءَ چہ سیت ءُُ نپ چست کننت ءُُ مشرق وسطیٰ ءَ ہما ملکاں آیانی حلافیں سرکار ہست اَنت آیانی سرا ارش کنئگ ءَ بندات کننت۔ امریکا ءُُ مغرب ءِ اولی شکار لیبیا بیت کہ اودا آ کرنل قزافی ءِ سرکار ءَ ہلاس کنئگ ءِ واستا اود ءِ مذہبی انتہا پسندءُُ کرنل قزافی ءِ حلافیں ٹولی ءَ زر دئینت دانکہ کرنل قزافی ءِ سرکار ءَ ہلاس بہ کن اَنت۔ چیا کہ کرنل قزافی ءِ سرکار مغربءُُ امریکاءِ حلاف انت ءُُ ہنچیں کارے کنئگ ءَ اِنت کہ آ مغرب ءُُ امریکا ءِ مفاداتاں تاوان دئیگ ءَ اِنت۔
مغرب ءُُ امریکا وتی پراکسی وارانی(Proxy War) وسیلہ ءَ کرنل قزافی ءِ سرکار ءِ ہلاس کنئگ ءَ سوب مند بنت۔ ہمے پئیم مغرب ءُُ امریکا شام ءِ تہا سرکار ءِ ہلاسی ءَ پہ کار کن اَنت ءُُ اسد ءِ سرکار ءِ ہلاسی ءِ جہد ءَ کن اَنت۔ پرچا کہ شام روس ءِ ہمپتی اِنت۔ امریکا ءُُ مغرب لوٹ اَنت کہ آ مشرقی وسطیٰ ءَ روس ءِ پلہ مرزی کنوکیں سرکاراں ہلاس بہ کن اَنت۔ دانکہ مغربءُُ امریکا وتی مفاداتاں شریں وڑے ءَ دیما بہ بر اَنت۔بَلے وہدے روس گندیت کہ آئی ءَ لیبیا ءِ تہا دزمانجنی نہ کرتگ اِے آئی ءِ مزنیں ردیاں چہ یک ردی یے بوتگ۔ آ زانت کہ اگاں آ شام ءِ تہا نوں دزمانجنی مہ کنت گڑا مشرقی وسطیٰ ءَ آئی ءِ بزانکہ روس ءِ مفاداں مزنیں تاوانے رسیت۔ پمیشکا روس شام ءِ تہا دزمانجنی کنت ءُُ امریکا ءُُ مغرب ءِ منصوبہاں سوب مند بوہگ ءَ نئیل ایت۔ وہدے شام ءِ تہا مغرب ءُ امریکا ءِ دزمانجنی ءِ تہا گیشی کئیت گڑا روس وتی مفاداتانی پہریزگ ءَ پہ بشار الاسد ءِ سرکار ءِ برجاہ دارگ ءِ واستا مزنیں گامگیج زوریت ءُُ وتی آرمی ءُُ فضائیہ ءءَ شام ءِ تہا بارت ءُُ نادین ایت ءُُ اودا وتی ملٹری بیس ءَ جوڑ کنت۔ (زانگ بہ بیت کہ ۱۹۹۱ ءَ چہ پد اے اولی رند اِنت کہ روس ءَ وتی فضائیہ ءَ ڈن ءِ ملکے ءَ برتہ ءُُ نادینتہ) شام ءِ تہا روس ءِ آرمی ءُُ فضائیہ ءِ آیگ ءَ پد شام ءِ جنگ ءِ دروشم بدل بیت۔ ہما شام کہ اودا پیسرا ہمے گشئگ بوتگ کہ مروچی یا باندا بشار الاسد ءِ سرکار ہلاس بیت۔ بَلے مروچی اودا بشار الاسد ءُُ روس ءِ دست مضبوط بوتگ اَنت ءُُ ہما دمگ کہ مذہبی انتہا پسند داعش ءُُ یاگیانی دست ءَ بوتگ اَنت یا آیانی بنجل جوڑ بوتگ اَنت بَلے نوں پدا شام ءِ سرکار ءِ دسترس گیش بوان اَنت۔ شام ءِ تہا سوب مندی روس ءِ یک مزنیں سوبمندی یے چیا کہ شام ءِ تہا دنیا ءِ دراہیں کھلاڈی جنگ ءَ ہوار اَنت۔ شام ءِ جنگ ءَ باج برئگ دنیا ءِ تہا سپر پاور ءِ منارینگ ءَ روس مغربءُُ امریکا ءِ پروش ءِ حساب ءَ چارگ ءَ اِنت ءُُ پدا دنیا ءِ تہا وتی ہما بستار ءِ گپ ءَ جنگ ءَ اِنت کہ ہما بستار یک سپر پاورئیگ اِنت۔
شام ءِ جیڑھ ءِ پژدرا اگاں مردم بہ چاریت تہ زانگ بیت کہ اے آشوب یک لس مہلوکی آشوبے نہ انت۔ بلکیں اے مغرب ءُُ امریکا ءِ جوڑ کتگیں آرگنائزیشنانی دیما بُرتگیں جہد ءُُ کوشش اِنت۔ آئی ءِ حاصیں مول ءُُ مراد بشار الاسد ءِ سرکار ءِ ہلاس کنئگ انت۔ اے آشوب ءِ مول ءُُ مراد اے نہ انت کہ اودا مہلوک ءِ لوٹ سرجم بہ بنت بلکیں وکی لیکس رپورٹے ءِ ردا ۲۰۰۶ ءَ چے اے جنگ ءِ تیاری بوتگ۔ اے آرگنائزیشن فنڈنگ کنئگ بوتگ انت تا کہ آؤکیں وہد ءَ اے بشارالاسد ءِ سرکار ءِ ہلاس کنئگ ءَ وتی کرد ءَ ادا بہ کن انت۔ اے آگنائزیشن داعش ءُُ یاگی اصل ءَ ترکی ءِ وسیلہ ءَ چہ کمک کنئگ بوتگ انت ءُُ دنیا ءُُ جہان ءِ جہادی یکجاہ ءَ مُچ کنئگ بوتگ انت۔ دانکہ اسد ءِ سرکار ہلاس کنئگ بہ بیت ءُُ اودا مذہبی شدت پسندانی سرکار بہ بیت ءُُ پدا امریکا ءُُ آئی ءِ ہمپتی ملکاں اودا پترگ ءِ موھ بہ رس ایت۔ ہنچو کہ آ لیبیا ءِ تہا پُترتگ اَنت۔ بلئے اے درچ ءَ روس ءَ آیانی منصوبہ بے سوب کت ءُُ داعش ءُُ یاگیانی دیم داشت انت ءُُ اقوام متحدہ ءَ شام ءِ جنگ ءِ درگت ءَ قرار دادے کہ آرگ بوت آ رَدءِے کُت اَنت۔ شام ءِ تہا روس ءِ دیم ءِ دارگ ءَ مغرب ءَُ ترکی کارمرز کُت کہ روس ءِ دیما بہ داریت ءُُ ۲۰۱۵ ءِ گڈسرا ترکی ءَ روس ءِ یک بالی گرابے جت ءُُ دَور دات۔ ایشی ءَ چہ پد روس ءَ ترکی ءِ سرا سک باز معاشی بندش جت ءُُ سکیں سنگینیں رد عمل پیش داشت اَنت۔ روس ءِ بالی گراب ءِ جنئگ ءَ پد ولادیمیر پوٹن ءَ پریس کانفرنس کت ءُُ گشت کہ ’’ترکی ءَ منی پُشت ءَ کارچ جتگ ءُُ حدا ایشی ءِ سزا ءَ ترکی ءَ الم دنت‘‘ پوٹن ءِ اے گپانی گشئگ ءِ مول ءُُ مراد ایش انت کہ روس یک طاقت یے است انت۔کجام ہم ملک گوں روس ءَ کست ءُُ کینگ بہ داریت۔گڑا آ سزا ءَ پہ ساڈی بہ بیت۔ ایشی ءَ چہ پد ترکی ءِ سرا بازیں بندش جنت کہ ترکی گڈسرا روس ءِ گورا پہلی لوٹگ ءَ لاچار بیت ءُُ معیشت ءِ بندشانی دِیر کنئگ ءِ لوٹگ ءَ کنت۔
ٌٌایران ءِ جیڑھ
ایران ءِ گوں دنیا ءَ سفارت کاری ءَ آئی ءِ جیڑھ ءَ گیش ءُُ گیوار کنئگ ءَ دنیا روس ءِ مزنیں سفارتی سوب مندی یے گشیت چیا کہ ہما وہد ءَ سرجمیں دنیا ءَ ایران ءِ سرا جنگے آرگ ءِ گپ کتگ اے وہد ءَ روس ءَ ایران ءِ پلہ مرزی کتگ ءُُ دنیا ءِ دیم داشتگ چیا کہ ایران روس ءِ ہمپتی ملکاں چہ یک ملکے۔ اے جیڑھ ءِ سفارتی گیش ءُُ گیواری کنئگ ءَ روس آیاں تہنا ہمے پیش داریت کہ ہر ہما ملک روس ءِ ہمپتی انت روس آ ملکاں تہنا یلہ نہ کنت ءُُ دنیا ءِ ہر مخالفت ءَ ابید ہم روس وتی ہمپتی ملکانی پلہ مرزی ءَ برجاہ داریت۔
یوکرائن ءِ جیڑھ
یوکرائن ءِ جیڑھ ۲۰۱۴ ءَ ہما وہد ءَ بندات بیت کہ یوکرائن ءِ صدر گوں روس ءَ مزنیں معاشی معاہدہ کنت۔ اے معاہدہ مغرب ءِ مفاداتانی خلاف ءَ روت۔ ہمے بنیاد ءَ مغربءَ گوں ہمگرنچیں مہلوک ءُُ پارٹی یوکرائن ءِ تہا سرکار ءِ حلاف ءَ جنزے بندات کن اَنت کہ آئی ءِ سرکار ہلاس بہ بیت۔ یوکرائن ءَ ۱۰ سال ءَ پیش ۲۰۰۴ ءُُ ۲۰۰۵ ءَ ہم سرکار ءِ ہلاف ءَ انچیں زہرشانی بوتگ ۔ مروچاں مغرب تچک ءَ ہما ملکانی تہا سرکاراں ہلاس کنئگ ءَ پہ وتی پراکسی(Proxy) آرگنائزیشانی کمکاں بندات کنت کہ اودا مغرب ءِ دژمنیں سرکار اِنت۔ اے آشوب ہم مغرب ءِ جوڑ کرتگیں بہانہے بیت۔ وہدے روس گندیت کہ مغرب یوکرائن ءِ تہا آئی ءِ مفاداتانی خلاف ءَ روگ ءَ اِنت۔ آ تچک ءَ یوکرائن ءِ تہا گوں وتی آرمی ءَ پتریت ءُُ یوکرائن ءِ دمگ کرائمیا(Crimea)ءَ چہ یوکرائن ءَ جتا کنت ءُُ یوکرائن ءِ دمگ دو نیٹسک(Donetsk) ءُُ لو ہانسک (Luhansk)ءَ یاگیاں سلاہ ءُُ مڈی دنت۔ اِدا روس مغرب ءَ اے کلوہ ءَ دنت کہ ہرچ کارئے کہ روس ءِ مفاداتانی خلاف بہ بئیت ۔ روس آیانی دیما اوشتیت ءُُ آیاں بے سوب کنت۔یوکرائن ءِ جیڑھ ءَ پد مغرب ءُُ امریکا روس ءِ سرا بازیں معاشی بندش جن اَنت۔ ایشی ءَ چہ روس ءِ معیشت ءَ مزنیں تاوانے ہم رسیت۔ بَلے روس وتی موقف ءَ چہ پُشت ءَ نہ کنزیت ءُُ اے بندشانی پُشت ءَ مغرب ءِ سرا ہم بازیں بندش جنت۔ روس مغرب ءِ سرا اِے بندشانی جنئگ ءَ پد اِے کلوہ ءَ دنت کہ منی وتی ھم یک بستارے است اِنت ءُُ کسے اگاں منی سرا بندش جنت گڑا آئی ءِ سرا ہم بندش جنئگ بوت کنت۔
پٹرول ءِ جیڑھ (Petrol Crisis)
امریکا ءَ شیل oilءِ درکپگ ءَ رند دنیا یک دگہ جیڑھےءَ ماں گیشتگءُ اے زانگ المی انت کہ پیٹرول ءَ اے جیڑہ قدرتی یے نہ انت۔ بلکیں اے پہ زور آرگ بوتگ دانکہ ہما ملک کہ امریکا ءِ مخالف اَنت آیانی معیشت ءِ بلاہیں کار ءُُ بار تیل ءِ سرا انت آیاں تاوان بہ رس ایت۔ اے ملکانی تہا یک ملکے روس انت کہ آئی ءِ معیشت ءِ یک مزنیں بہرے تیل ءِ سرا اِنت۔ اے جیڑھ ءِ دیما آرگ ءِ مول ءُُ مراد ہم ہمیش انت کہ روس ءِ معیشت ءَ تاوان بہ رس ایت ءُُ آ اے جاہ ءَ سر مہ بیت کہ دنیا ءِ سرا وتی اثراتاں دَور بہ دنت۔ بَلے پٹرول ءِ جیڑھ ءَ روس ءِ معیشت ءَ مزنیں تاوان ءَ پد ہم روس نہ وتی موقف ءَ پد کنزتگ ناں کہ روس ءَ دنیا ءِ جیڑہاں چہ وتی دست کش اتگ۔اے روس ءِ جہد ءُُ کوشش انت کہ مروچی پدا تیل ءِ نہاد گیش بوہان انت ءُُ اے جیڑھ گیش ءُُ گیوار ءِ نیمگا روگ ءَ انت۔ اے روس ءِ سوب مندی انت کہ اینچو جیڑھ ءَ پد ہم دنیا ءِ سرا وتی اثر ءَ دَور دےئیگ ءَ اِنت۔ اے درچ ءَ روس پہ مغرب ءُُ امریکا ءِ واستا سر دردے جوڑ بوتہ۔ روس چہ اے سوب مندی ءَ پیش دارگ ءَ اِنت کہ دنیا ءِ سیاست ءُُ جیڑہانی تہا کس منی کردار ءَ کم کُت نہ کنت۔ آؤکیں وہد ءَ اے کردار ءَ جوان تر ءُُ شرتریں وڑے ءَ دیما کاریت۔

بریکس بینک (BRICS Bank)
بریکس بینک برازیل، روس، انڈیا، چائنا ءُُ ساؤتھ افریقا ءِ جوڑ کرتگیں بینک انت کہ کم شرح سود ءِ سرا وتی ہمساہگ ءُُ کش ءُُ گور ءِ ہمپتی ملکاں وام دنت۔ دانکہ ورلڈ بینک، آئی ایم ایف ءُُ مغرب ءَ گوں سیادی داروکیں ادارہانی اثراتاں کم بہ کنت ءُُ اے ملکانی اثرات گیش بہ بنت۔ اے بینک ءِ جوڑ کنئگ روس ءِ مزنیں سوبی اِنت پرچا کہ اے بینک ءِ سبب ءَ مغرب ءُُ امریکا ءِ ہما اثر اے نیمگا بوتگ اَنت آیانی تہا بازیں کمی اتکگ ءُُ روس ءِ واہگ بوتگ کہ اِدا چائنا، انڈیا ءُُ آئی بزانکہ روس ءِ اثر گیش بہ بنت۔
سلاہ ءِ انڈسٹری(Arm Industry)
سلاہ انڈسٹری دنیا ءِ مستریں انڈسٹری اِنت۔ دنیا ءِ بلاہیں طاقتانی سلاہانی انڈسٹری ءِ سرا دسترس سک مزنیں ارزشتے داریت۔ دنیا ءِ سلاہانی انڈسٹری ءِ سرا ہماملک ءِ دسترس بوت کنت کہ آ دنیا ءِ سیاست ءِ سرا بلاہیں دسترسے داریت۔ چشکہ سویت یونین ءِ پرشگ ءَ پد دنیا ءِ مستریں طاقت امریکا بیت ءُُ سلاہانہ انڈسٹری ءِ سرا غیر شراکت داریں سرکار جوڑ بیت۔ بَلے روس ءِ یک رندے پداسرچست کنگ ءُ یک طاقتے ءِ جوڑ بُوہگ ءَ پد روس وتی سلاہانی انڈسٹری ءِ سرا سک باز دلگوش گور کنت۔ اسکندریہ دفاعی میزائل سسٹم ءَ نوک کنت ءُُ وتی بین البراعظمی میزائلانی سرا دلگوش دنتءُُ دنیا ءِ نوکیں لوٹانی رِدا وتی ہیلی کاپٹر ءُُ سلاہاں جوڑ کنت ءُُ مروچی دنیا روس ءِ جوڑ کرتگیں سلاہانی مزنیں لوٹوک انت۔ نوں روچ پہ روچ روس ءِ سلاہانی انڈسٹری دیمروئی کنان انت۔ ہما سلاہانی انڈسٹری کہ پیسرا اودا ایوکا امریکا ءِ بادشاہی بوتگ بلئے نوں روس ءَ اودا امریکا ءِ بادشاہی ہلاس کتگ۔مروچی امریکا ءَ پد روس دنیا ءِ تہا سلاہانی بہا کنوکیں مستریں ملک انت۔
امریکا ءِ گچین کاری بہ بئیت یا شام ءِ جیڑھ، مروچی روس ءَ وتا منارینتگ کہ دنیا ءِ توکا منی یک طاقت است انت ءُُ بے روس ءِ ہواری ءَ دنیا وتی پالیسیاں جوڑ کُت نہ کنت۔ ۲۰۱۲ ءَ ماسکو ءَ یک ائیرشوے ءَ ولادیمیر پوٹن اے گپ ءَ جنت کہ ’’من روس ءَ پدا ہما جاہ ءَ سر کناں کہ روس ہما جاہ ءِ حق دار اِنت‘‘ ولادیمیر پوٹن ءِ سروکی ءَ روس ءَ وتا منارینتگ کہ بید ءِ روس ءِ سروکی ءَ دنیا دیما شُت نہ کنت اگاں دنیا ءَ دیما روگی انت گڑا روس ءَ گوں ہوار دیما رو گ المی اِنت۔ وہدے ما اے چیزاں گندیں ءُُ دنیا ءِ سیاست ءَ چاریں گڑا مارا ہمے گندگ کئیت کہ دنیا ءِ تہاایشیا ءِ ملک روس، چینءُ انڈیا آؤکیں وہد ءَ دنیا ءِ پالیسیانی دیما برؤکیں ملکانی تہا ہوار بنت ءُُ ما ہمے گندگ ءَ ئیں کہ دنیا ءِ طاقت ءِ توازن ویسٹ ءَ چہ در کپئگ ءُُ ایشیا یا شغربءِ نیمگا پیداک اِنت۔۔

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s